【Omicron病徵】C Allstar On仔居家抗病日誌：喉嚨痛先係大佬！記錄頭9天發病症狀、中醫紓緩方法
本港第5波新冠疫情不斷升溫，男子組合C AllStar成員之一的陳健安（On仔）日前表示自己確診新冠肺炎，更分享這幾天發病時的症狀和經歷。
Photo from on_callstar's instagram
On仔日前（17日）在社交平台Instagram中表示自己確診新冠肺炎，之後更以「Omicron日誌」為題，記錄低自己頭9天發病的情況、病徵、應對方法。他指，發病頭幾天以喉嚨痛為主，去到第7天喉嚨十分痛，故遙距看中醫，跟隨中醫建議，洗鼻、漱口、食藥後，症狀明顯改善，惟去到第9天，其快速檢測仍呈陽性。
Day1
喉嚨痕，右頸痛好似瞓捩頸。
Day2
味覺嗅覺無咁敏感，乾咳，夜晚有發冷出汗，朝早到左頸痛，超頭痛頭赤，無胃口。
Day3
瞓覺少少發冷，少少發熱出汗，頭好赤痛，無胃口，臨瞓開始喉嚨痛，嚟得好突然。
Day4
瞓醒喉嚨好痛，頭重，攰，胃口好啲。
Day5
喉嚨仍然好痛，有咳，有黃痰。
Day6
喉嚨痛無減，吞口水痛，食嘢飲水就無痛，無頭痛，無乜攰，無肌肉痛，有痰有咳，啲痰好似喺肺部深處，俾啲力深呼吸先咳到出嚟。胸腔位置有啲緊。
原來喉嚨痛先係大佬。
Day 7
喉嚨又熱又痛，呑口水超痛，感覺好似成個喉嚨都係飛滋咁，乾咳。照鏡，原來喉嚨有發炎同少少白點，所以咁x痛，即刻遙距睇中醫，教我洗鼻漱口，希望啲菌唔好落氣管。第一個鐘用暖鹽水洗鼻漱口，第二個鐘用暖綠茶漱口，感覺特別清雅，然後重覆，做到瞓覺為止，即刻舒服好多。
最特別嘅方法係叫咬碎生蒜頭含喺口15分鐘，殺菌，就搞到我好想食台灣腸仔。
另外佢都教咗我買啲中成藥同藥房買到嘅西藥，感冒沖劑、板藍根沖劑、lysozyme，亦有問佢使唔使買連花清瘟膠囊，佢話唔可以亂食，一定要有中醫師診症之後先好食，大家留意喇。
再強調，我以上所講嘅藥都系睇完醫師先食，只啱我，人食你又食，就有機會令病情惡化。知識改變病情。
Day 8
呢個溫度，加埋疫情，睇嚟冰河時期要嚟喇。
今朝瞓醒，喉嚨好左至少三成，去到黃昏，飲多兩劑藥繼續洗鼻漱口食蒜頭多喝水，噴蜂膠含umf20+蜜糖，喉嚨起碼好返一半，舒服好多。
最忙係不停煲水同埋瞓覺，平均一日瞓15個鐘。
Day 9
喉嚨得返10%痛，不枉我努力每個鐘暖鹽水洗鼻漱口綠茶漱口。瞓覺幾聲乾咳，瞓醒輕易咳出少量黃痰。無其他嘢，係繼續有啲眼瞓，食得好清，皮膚幾好。
快檢仍然係positive。
omicron唔係咩醜事，亦唔使怕被人歧視，多分享多討論多看世界各地新聞和文獻，自己救自己，減低醫療負擔，互相幫忙，減低恐懼帶來嘅焦慮，與病毒共存。
Text : UrbanLife Health Editorial
Photos : UrbanLife Health Editorial
📍 Follow我們的IG urbanlife.hk
🔔 訂閱我們的 Youtube頻道 UrbanLifeHealth生活新態度
