【腎臟殺手】醫生盤點5大醬料排行榜：冠軍竟是港人必備 堪稱腎臟終結者
醬料係港人飲食嘅靈魂，無論係點心定燒味都要「加色水」，但呢啲濃郁嘅味道，分分鐘係摧毀你腎臟嘅「化學武器」！
醫生盤點：5大傷腎醬料排行榜
腎臟科醫生洪永祥分享，有患者以為豆瓣醬係發酵豆製品好健康，結果餐餐狂加，導致血壓爆升、雙腳水腫。以下係醫生列出嘅傷腎名單：
- 第 5 名：沙律醬（白色脂肪炸彈） 含脂量高達 80%，充滿化學增稠劑同乳化劑，會令血管硬化，加重腎臟負擔。
- 第 4 名：沙茶醬（磷鉀爆彈） 火鍋必備，但由扁魚乾同蝦皮製成，磷同鉀含量極高。加上大量無機磷添加物，腎病患者一食即血磷超標。
- 第 3 名：番茄醬（糖鹽混合體） 披住水果外衣，實則糖分同鈉含量極高。高糖會誘發尿酸升高，對糖尿病腎病人士係雙重打擊。
- 第 2 名：豉油膏 / 醬油膏（化學鹽水） 為咗營造「掛汁」效果，加入咗修飾澱粉同焦糖色素，鈉含量比普通豉油高得多，一匙已經等如攝入 300 毫克鈉。
- 第 1 名：辣豆瓣醬（腎臟終結者） 每 100 克含鈉量高達 7000 毫克，鹽分超標世衛建議 3 倍。加上發酵豆類嘅有機磷同防腐劑嘅無機磷，對腎臟係毀滅性打擊。
點解醬料咁傷腎？
醫生解釋，醬料入面有三大威脅：
- 高鈉衝擊： 好似「高壓水槍」咁衝擊腎小球，令過濾屏障加速崩壞。
- 無機磷「百分百吸收」： 加工醬料嘅無機磷，人體吸收率接近 100%，極易引發高磷血症，導致血管鈣化。
- 隱形糖分： 誘發尿酸升高，導致腎臟組織纖維化。
2 招「護腎調味」：食出原味高級感
想保護腎臟又唔想食到淡茂茂？試下醫生推薦嘅方法：
- 1. 善用大自然「醬料」： 改用蔥、薑、蒜、洋蔥、辣椒或九層塔、番茜等天然辛香料，香氣十足但鈉含量極低，仲有抗炎效果。
- 2. 用「酸味」取代鹽分： 喺燒魚或燙青菜淋上檸檬汁或白醋。酸味可以欺騙大腦，提升鮮味，令你對鹽分嘅渴求大幅下降。
Text : UrbanLife Health Editorial
Photos : UrbanLife Health Editorial
📍 Follow我們的IG urbanlife.hk
🔔 訂閱我們的 Youtube頻道 UrbanLifeHealth生活新態度
