【早日康復】64歲伯伯遭年輕男女撞跌骨折需動手術 女兒網上尋人要求道歉：點解唔call白車？
「到底有幾趕時間，可以令你唔睇人、唔睇路？」近日有一名女網友在社交平台Facebook發「尋肇事者」貼文，指其64歲的父親於本月4日在筲箕灣港鐵站出口遭一對年輕男女撞跌在地，對方只扶伯伯到一旁休息，其後疑為趕巴士匆匆離去，無幫忙報案送院。女網友的父親盆骨及大腿均有骨折，需留院觀察。該名女網友表示，發文不為追究賠償，僅要求涉事男女向父親正式道歉。
64歲伯伯遭年輕男女撞跌在地
該名女網友於社交平台Facebook以標題「尋肇事者」發文表示，64歲的父親於4日下午約1時許，在筲箕灣港鐵站A2出口，遭一對年輕男女撞跌在地，當時父親未能自行起身，但因愛面子性格，僅表示「俾我坐下、坐下」。兩名年輕男女只扶伯伯到旁邊坐下休息，之後便疑因趕巴士匆匆離去。
對方無幫忙報案送院
女網友表示，「我覺得你見到個老人家撞跌完，坐喺路中心，起唔到身，你都應該關心耐啲」，「兩位肇事者冇幫我老豆call白車，冇等到白車嚟，係咁以扶我老豆去地鐵站出口坐低就走咗」。女網友坦言，她的父親未意識到自己的傷勢嚴重，被撞倒後一直坐在港鐵站口，「自己一個好驚，唔知點好，痛到講唔到嘢，好彩有途人打999」。
伯伯的大腿、盆骨均有骨折
女網友的父親被送院後，經檢查發現大腿、盆骨均有骨折，需留院觀察，期間「不斷話好痛，痛到瞓喺度都休息唔到」。女兒透露，父親平時都算精靈，不時會同老友記去飲茶，「年紀大手腳慢就一定，但佢自己一個人港島東區周圍行吓，係冇問題」，但目前就要在「醫院足足痛咗成日，唔知之後影響有幾大⋯⋯何苦要老人家受苦」。
Photo from Emily Chan Facebook
不為追究賠償，僅要求道歉
女兒見父親無辜受傷大感心痛，發文希望能找出這兩個人，不為追究賠償，僅要求涉事男女向父親正式道歉。女兒表示，「到底有幾冷酷無情，先可以罔顧一個因為你受傷嘅老人家，見到佢明顯企唔返起身，你都可以走咗去？」、「點解唔call白車、點解唔等埋白車來先走？」
網民幫忙轉發：唔可以道歉就算！
帖文引起網民關注，不少網民憂慮老人家「跌一跌真係會好傷」，認為年輕男女應向伯伯道歉，甚至提供賠償，「撞到老人家可大可小！手尾可以好長，佢哋不顧而去，一定唔可以道歉就算」。有人則認為女網友應報警保留追究權利，「骨折可以好嚴重，影響好深遠，報警搵返嗰兩個人係要保留追究權利」。
女兒隨後更新補充，指父親已驗血，5日進行手術，要打釘去臀部固定位置及打石膏。9日父親的情況穩定，轉去養和醫院。希望伯伯早日康復！
Text : UrbanLife Health Editorial
Photos : UrbanLife Health Editorial、Emily Chan Facebook
📍 Follow我們的IG urbanlife.hk
🔔 訂閱我們的 Youtube頻道 UrbanLifeHealth生活新態度
