【生死離別】曾俊華睇《破地獄》有感而發 憶亡父勞碌一生惟患肺癌離世：封塵多年最深刻的離別
港產電影《破地獄》由黃子華、許冠文及衛詩雅主演，以探討死亡話題直撼港人的心，電影成功勾起無數港人埋藏深處的情感，近日成為全城熱話。前財政司司長曾俊華亦有觀看，在社交平台發文，大讚「呢齣戲都係相當完美！」，又憶述與已過身的爸爸的往事，父親在49歲不敵肺癌病逝，成為曾俊華心中最深刻的傷痛之一。
Photo from 電影劇照
曾俊華：父親離世是心中最深刻的傷痛之一
現年73歲曾俊華在社交平台分享說，自己是一個樂觀且能「拎得起放得低」的人，但電影讓他回憶起多年前父親的離世，這是他心中最深刻的傷痛之一，也是自己「等待破解嘅心結地獄」。他形容父親是家庭的支柱，無論在經濟上、精神上還是情感上，父親都扮演著重要角色。
曾父勞碌半生患肺癌離世
曾俊華的父親多年前在香港任職老師，雖然生活安穩，但為了4名孩子有更好的教育環境，其父作出了移民美國的艱辛決定。期間，他參與過很多勞動性的工作，包括製造罐頭的鋼鐵廠、大型洗衣廠及餐館等。不過，在曾俊華就讀大學那一年，父親證實患上肺癌，並在49歲之年宣告不治。雖然已事隔數十年，但曾俊華坦言一直忘不了與父親的點點滴滴，「如今我都已經比我爸爸（過世時的歲數）老喇，但係思念猶在。」
曾俊華感慨，「死亡」在華人社會的避諱，光是說出「死」一字，已會令父母親或祖父母的那一輩人認為會「帶來不幸」。曾俊華最後寄語大眾，「死亡係每個人必經之路，喺面對死亡嘅同時，放低過去纏繞不解嘅心結或者怨憤，向前走，先至能夠真正破除心裡面嘅無間地獄。」
Photo from 曾俊華 Facebook
曾俊華分享全文
睇完《破地獄》，行出戲院嘅一剎那，心裡面講咗句：「呢齣戲都係相當完美！」，一種久違嘅滿足感。
呢套電影唔單止英文名 Last Dance 改得好，佢哋仲用咗中國人喪禮上面，有時會見到嘅破地獄儀式嚟做戲名，係相當聰明同有多重意義。呢個「地獄」，除咗係指對已逝去嘅先人，亦都係指仍然活著嘅人，佢哋喺人生路上，可能都有唔同嘅困苦地獄，需要去擊破。
我自己都算係個樂觀，可以拎得起，放得低嘅人，所以我唔覺得，自己心底裡面仲有一個等待破解嘅心結地獄。不過，呢套電影就令我諗起爸爸，勾起呢個已經封塵多年最深刻嘅離別。
我爸爸可以話係屋企嘅支柱，不單係喺經濟上，仲有係精神上、情緒上，以至係維繫家庭，好似磐石一樣嘅支柱。佢喺香港本來係老師嚟，過住穩定嘅中產生活，後嚟為咗令我哋四兄妹，有更好嘅教育機會，一家人毅然移民美國。人生路不熟，去到美國冇辦法重操故業，只係能夠由白領變藍領，最初佢去到一家製造罐頭嘅鋼鐵廠工作，後嚟本土製造業息微，佢又跟隨唔少華人嘅步伐，到過一啲大型洗衣廠同餐館打工。我細個嗰時就已經意識到，呢啲係好辛勞嘅艱苦工作，但係爸爸為咗屋企，一直任勞任怨咁工作。
Photo from 曾俊華 Facebook
不過，上天並無眷顧我呢位默默勞苦顧家嘅父親。喺我大學畢業後，剛剛踏入社會工作頭一兩年，屋企就突然傳來噩耗，話爸爸患咗肺癌。當年醫術比依家落後得多，確診之後，病情急轉直下，冇幾耐，我同兩個喺唔同省份讀緊大學嘅細佬，都收到屋企通知，要趕返紐約跟爸爸道別。爸爸撒手人寰之時，只有 49 歲。可想而知，佢嘅離去，對我哋一家人係幾沉重嘅打擊。如今我都已經比我爸爸老喇，但係思念猶在。
喺我父輩或者祖父母嗰一輩人，對死亡呢個問題好避忌，甚至喺生活日常，佢哋都唔畀我哋提個「死」字，因為佢哋覺得單係「死死聲」，已經會為家庭帶嚟不幸。
我仲記得喺我細個嗰陣，如果幢樓有人喺屋企死咗，啲人係要特別搭個棚，然後喺個窗或者露台嗰度，將載住先人嘅棺木搬落樓，因為佢哋會認為，屍體經過嘅地方，都係不祥嘅，甚至覺得會惹嚟鬼魂。以前啲人通常都會迷信一啲，而《破地獄》就好有教育性，透過唔同嘅人物故事，探討超越死亡嘅各種愛同情，父母子女之情、兄弟手足之情，以至刻骨銘心嘅愛情。兼任編劇嘅導演陳茂賢，喺疫情期間，經歷外婆同多位親人嘅離去，令佢對死亡同親情有好深刻嘅體會，相信亦都係咁，令佢可以寫出一個咁完整、咁動人嘅劇本，而喺戲裡面每個故事都咁細膩動人，仲可以有完整嘅交待，加上許冠文、黃子華同衛詩雅各位演員嘅出色演出，令整套戲真係好完美。
我相信入場嘅觀眾，總會喺電影劇情當中，睇到曾經刺痛過自己嘅一啲人生片段。講到底，死亡係每個人必經之路，喺面對死亡嘅同時，放低過去纏繞不解嘅心結或者怨憤，向前走，先至能夠真正破除心裡面嘅無間地獄。
患肺癌高危人士
- 吸煙者或二手煙暴露者：吸煙是肺癌的主要病因之一，吸煙者患上肺癌的風險是非吸煙者的10倍以上，因此無論是長期吸煙者或是二手煙暴露者，都會有著患上肺癌的風險。
- 長期接觸空氣污染的人：如果長期生活在空氣污染嚴重的城市或工業區等空氣污染嚴重的地區，會大大的提升患上肺癌的風險。
- 職業暴露人群：長期從事有害化學物質、放射性物質、粉塵或氣溶膠等有害物質的職業，如煤礦工人、化工廠工人、建築工人等。
- 帶有家族史的人：有肺癌家族病史的人，一般上會比其他人更容易患上肺癌。
- 免疫系統出現問題患者：如經過了器官移植後服用免疫抑制劑或愛滋病患者等，這些疾病會導致免疫系統功能受損，由此就無法抵制肺癌細胞的侵入，從而增加罹患肺癌的風險。
- 高齡人士：隨著年齡的增長，身體的器官功能與免疫系統逐漸衰弱，可能會出現肺功能下降等問題，這些問題都有可能會患上肺癌。
- 家庭主婦：由於家庭主婦長期處理家裡事務，如煮飯、清潔、打掃等，就較容易的長期接觸到燃煤、燃氣、油煙，與清潔用品內的成分如甲醛、有機氯等致癌物質，這些有害物質都是患上肺癌的危險因素之一。
Text : UrbanLife Health Editorial
Photos : UrbanLife Health Editorial、John Tsang 曾俊華 FB
📍 Follow我們的IG urbanlife.hk
🔔 訂閱我們的 Youtube頻道 UrbanLifeHealth生活新態度
