download UrbanLife 健康新態度 app
【身殘志堅】的士司機分享輪椅少年勵志故事 落車父親現身結尾超窩心感動網民

【身殘志堅】的士司機分享輪椅少年勵志故事 落車父親現身結尾超窩心感動網民

健康資訊 焦點新聞
By Maeve on 11 Jan 2023
Digital Editor

日前有一位的士司機在網上發帖分享一段超勵志故事,指自己接載了一名十多歲、需坐輪椅的少年。少年身殘志不殘,不但懂得自行為輪椅拆件上車,更無需司機的協助,並自嘲「隻腳跛啫,隻手都仲郁到」,堅強又獨立的性格令司機大感佩服。不少網民也大受感動,留言大讚少年「身殘,志不殘」。


日前有一位的士司機在網上發帖分享坐輪椅少年勵志故事。

少年拒絕司機的幫助

該名的士司機在Facebook群組「的士司機資訊網 Taxi」分享指,日前晚上在旺角創興廣場附近接載了一名十多歲的輪椅少年。當時他本打算下車替少年搬輪椅上車,沒想到少年僅禮貌表示只需待會幫他把輪椅椅架放置在車尾即可。

「我開咗度門,諗住幫佢搬架輪椅上車,點之佢話唔使,剩係幫佢搬個椅架喺尾箱就得,都未講完佢就趷下趷下跳咗上車先,跟住就自己拉近架輪椅,然後好快手咁拆左兩個轆擺喺佢隻腳附近,之後好有禮貌咁叫我張個椅架擺喺車尾。」

少年上車後,表示要去西貢的村屋,司機當時心想:「呢個後生仔都幾得,十幾歲仔坐住輪椅,又唔使人陪,完全可以照顧到自己,都算係咁。」

少年自行出街拆輪椅上的士,獨立性格令司機大感佩服。

自嘲:我隻腳跛啫,隻手都仲郁到

在開往目的地途中,司機又好奇問起少年為何不使用電動輪椅。少年回答,因為「電動輪椅太大架又重,好難搵到車搭,夜媽媽未必預約到」,相反目前自己的輪椅可以快拆,比較方便,又自嘲道:「我隻腳跛啫,隻手都仲郁到。」司機坦言當時聽到這句「真係唔知心酸定好笑」,兩人靜默了片刻,不知道該給予甚麼回應好。

司機讚:父親是少年最強後盾

途中少年突然接到電話,司機估計是對方父親詢問何時到家,但少年表示︰「唔使去接我,我自己搞得掂!」當的士到達西貢村屋個路口,對方父親已企定定等候,少年付車資後還不忘跟他道謝。

司機目睹兩父子背影離開,感嘆:「佢老豆好緊張個仔落車嗰下,扶到實一實,個仔就話得啦搞得掂,我覺得佢老豆都係個人才,夠膽俾個仔自己出去做佢嘅嘢,但係返到屋企時就係個仔嘅最強後盾,呢兩父子真係超窩心!」

兩父子的背影令人感到窩心。Photo from 「的士司機資訊網 Taxi」Facebook

堅毅不屈感動網民

帖文引起網民熱議,不少網民紛紛感動留言表示,「父子情深,不用講出口,感人」、「我睇到眼濕濕,好感動!」、「正能量,身殘志堅,比很多人強大」。同時也有網民大讚的士司機不介意接輪椅客,有同理心,「師傅真係俾個Like你。因為你十分正能量、用你嘅愛心去接載 一個乘客」、「香港多啲你呢啲師傅就真係very good,的士界就係要有你呢啲存在」。的士司機則謙虛回應表示不用過分讚賞,接輪椅客其實是基本責任,「幫吓人又有錢賺,何樂而不為」。

📍 Follow我們的IG urbanlife.hk

🔔 訂閱我們的 Youtube頻道 UrbanLifeHealth生活新態度