【希望有奇蹟】先天性大血管移位BB允祈情況轉差　父母忍痛決定放棄治療：唔想佢再辛苦

約11個月大男嬰張允祈（張保仔）一出生發現患先天性大血管移位，出生後隨即接受心臟手術惜過程失敗，醫生曾指允祈BB或只有4個月命。允祈BB近日情況再轉差，其父母忍痛決定放棄治療，陪伴允祈BB走最後一段路。「之後就由佢自己決定走餘下既路，睇佢會走幾耐」。

Photo from 張保仔！邁向偉大航道 Facebook

Photo from 張保仔！邁向偉大航道 Facebook

允祈父母開設社交平台「張保仔！邁向偉大航道！」，為堅強的仔仔紀錄。允祈父母指，允祈BB在出生前已發現大血管移位，一出世便要做心臟手術，可惜手術不算成功。手術後允祈BB身體開始出現很多大大小小的問題，如全身水腫、上腔靜脈瘀塞、肺積水、腎功能急促下降等，醫生更早於去年8月已明言「佢情況唔好，無嘢可以做」。

然而，堅強的允祈BB捱過一關又一關，接受了不同的治療，竟然奇蹟地撐過了300天。因疫情無法經常在醫院陪伴在兒子身邊的允祈父母表示，「舒服定義，每個人都唔一樣。我知道你（允祈BB）呢一刻，最舒服既就係有爸爸媽媽陪住你，鍚吓你，拍吓你。」、「我真係只希望可以一直陪住你左右」。

Photo from 張保仔！邁向偉大航道 Facebook

Photo from 張保仔！邁向偉大航道 Facebook

直至昨日，允祈父母帶來壞消息，他們發文指，「要發生嘅始終發生」，允祈BB近日情況再轉差，他們聽完醫生的意見後，決定忍痛放棄治療，陪伴允祈BB走最後一段路。「如果再有差嘅情況出現，我哋唔會再做任何改正，只會俾瞓覺藥保仔，之後就由佢自己決定走餘下既路，但現階段唔會有任何改變，就睇佢會走幾耐」。

允祈父母表示，這是一個痛苦的決定，「我真係唔想保仔再辛苦」、「衰豬爸爸好唔捨得你」、「放手其實好難」，言語間盡見不捨、掙扎、痛心的心情。允祈父母表示，他們現時只希望能陪著允祈BB，「無時無刻都陪住」。

允祈父母今午再更新，指「呢一日盡量去做想做嘅嘢，一直都想同佢真真正正沖個涼、試下其他嘅味道」，於是給了一點蘋果汁、橙汁、3.6奶、朱古力奶、士多啤梨、甜柑允祈BB嘗試，又指允祈BB最愛是蘋果汁，「嗒到好開心」，允祈父母指直言，「唔知仲有幾多機會同保仔做一啲願望，唯有盡做。」

延伸閱讀：
【生命鬥士加油】4歲癌童Sheldon平安返港！機場捱足7個多小時　等檢測報告出爐再去酒店隔離

延伸閱讀：
【生命鬥士】5歲兒患血癌病情反覆對治療感絕望　淡然問媽媽：你知道死了是怎樣嗎？

Text：UrbanLife Health Editorial
Photos：張保仔！邁向偉大航道！
Source：張保仔！邁向偉大航道！ 授權轉載